Amerikanın nüfuzlu iqtisadi-maliyyə jurnalı “Forbes” “Gallup World Poll” təşkilatı tərəfindən hazırlanan “Ən xoşbəxt ölkələr”in reytinq cədvəlini dərc edib. Dünyanın 155 ölkəsində minlərlə respondent arasında aparılan sorğunun nəticələrinə görə məlum olub ki, Skandinaviya və Şimali Avropa ölkələrini “xoşbəxtlik” kriteriyaları üzrə lider hesab etmək olar.

Beləliklə, bu kriteriyalar üzrə birici yerdə sorğulanan əhalisinin 82 faizinin özünü xoşbəxt hesab etdiyi Danimarka durub. Onun ardınca Finlandiya, (75 faiz), Norveç (69 faiz), İsveç (68 faiz), Niderland (68 faiz), Yeni Zelandiya (63 faiz), Kosta-Rika (63 faiz), Kanada, İsveçrə, Avstraliya və İsrail (Hamısı 62 faiz) qərarlaşıb.

Sorğunun nəticələrinə görə, Azərbaycan və Türkiyə reytinq cədvəlində 103-cü yeri bölüşüb. Hər iki ölkədə sorğulananların 13 faizi özünü xoşbəxt hesab etdiyini ifadə edib.

Qeyd edək ki, Azərbaycan bu göstəriciyə görə, iki Cənubi Qafqaz ölkəsi - Gürcüstan və bədnam qonşumuz Ermənistanı qabaqlayıb. Belə ki, bu ölkələrdə aparılan sorğuya görə, Ermənistanda 11 faiz, Gürcüstanda isə 10 faiz respondent hazırki dövrdə xoşbəxt olduğunu dilə gətirib. Nəticədə Ermənistan və Gürcüstan müvafiq olaraq 110 və 115-ci yerlərdə qərarlaşıblar.

Qonşu Rusiyada isə respondentlərin 21 fazi özünü xoşbəxt hesab edib.

Reytinqin son pillələrində ənənəvi olaraq Afrika ölkələri mövqe tutub. Bu ölkələrdə xoşbəxt olanlar 5 faizdən artıq olmayıb. /anspress