Azərbaycan Respublikasında vətəndaşların Dövlət orqanlarına işə qəbulu müsabiqə və müsahibə əsasında aparılır.
Müsabiqə və ya müsahibədə kimlər iştirak edə bilər:
On altı yaşına çatmış, irqindən, milliyyətindən, dinindən, dilindən, cinsindən, sosial mənşəyindən, əmlak vəziyyətindən, yaşayış yerindən, əqidəsindən, ictimai və digər birliklərə mənsubiyyətindən asılı olmayaraq, müvafiq vəzifənin tələblərinə uyğun peşə hazırlığına malik olan və Azərbaycan Respublikasının dövlət dilini sərbəst bilən, habelə dövlət qulluğuna qəbul edilmək üçün qanunvericiliklə müəyyən olunmuş şərtlərə cavab verən Azərbaycan Respublikasının vətəndaşları dövlət qulluğuna qəbul edilmək üçün müsabiqəyə buraxılırlar.
Yəni müsabiqədə müvafiq ali təhsilli, hətta iş stajı olmayan hər bir vətəndaş iştirak edə bilər.
Lakin müsahibədə müvafiq iş üzrə minimum 5 il iş stajı olan vətəndaşlar iştirak edə bilər.

Müsabiqə və müsahibə necə aparılır:
Dövlət qulluğuna qəbul üçün Azərbaycan Respublikasının Prezidenti yanında Dövlət Qulluğu Məsələləri üzrə Komissiya (DQMK) müsabiqə elan edir. Elan DQMK-nın rəsmi internet saytında və digər kütləvi informasiya vasitələrində verilir.
Dövlət qulluğuna qəbul edilmək üçün vətəndaşlar müsabiqə elan edilən gündən etibarən 30 gün ərzində tələb olunan sənədləri Komissiyaya təqdim edirlər.
Müsabiqə test imtahanından və müsahibədən ibarət olur.
Sənəd qəbulu bitdikdən sonra test imtahanı keçirilir.