Putin Rusiyanın “NTV” telekanalına müsahibəsində Berlin divarının dağıdılmasından sonra onun Drezdendə işlədiyi bürosuna bir çox insanın gəldiyini, ancaq onlarla DTK əməkdaşları arasında hər hansı bir insedentin baş vermədiyini bildirib.
“1985-ci ildə Şərqi Almaniyada vəzifəmin icrasına başladığım zaman SSRİ-də Perestroyka artıq başlanmışdı. Ümumiyyətlə həmin illərdə vəziyyət olduqca gərgin idi. Drezdendə işləməyimə baxmayaraq, hər həftə Berlinə gedib-gəlirdim. Orada Berlin divarını gördüyüm zaman məndə də müəyyən hisslər oyanırdı. Bu qeyri-təbii və həqiqətlə üst-üstə düşməyən hisslər idi. 1989-cu ildə Berlin divarı dağıdıldığı zaman işlədiyim bir çox insan gəlmişdi. Mən onlara binanın SSRİ ordusuna aid olduğunu və müəyyən razılaşmalar çərçivəsində burada işlədiyimizi bildirmiş, onlar bir müddət sonra binanı tərk etmişdilər”, - deyə Putin bildirib.
Baş nazir mövzu ilə bağlı sualları cavablandırarkən Berlin divarı ilə Çin səddini müqayisə etməyi unutmayıb.
“Bəşər övladının öz əli ilə inşa etdiyi və kosmosdan müşahidə edilən yeganə tikili Çin səddidir. Görəsən nə üçün Berlin divarı dağıdıldığı halda Çin səddi indiyədək mövcuddur? Çünki Çin səddi insanları qorumaq, Berlin divarı isə insanları bir-birindən ayırmaq üçün inşa edilmişdi. Artıq insanları müasir dünyanın proseslərindən kənarda saxlamaq mümkün deyildir. Cəmiyyətləri parçalamaq perspektiv vəd etmir”, - deyə Putin qeyd edib.
Rusiyanın Baş naziri 1989-cu ildə Berlin divarının dağıdılması və Almaniyanın birləşməsindən sonra Rusiya ilə Almaniya arasında əlaqələrin daha inkişaf etdiyini bildirib.
/ihlas/